曳

聽聞貓貓好鬼醒，冬天會窩身全屋最暖既地方，相反，夏天就會駐守全屋最涼快既角落。



憑觀察阿七同子彈仔既習慣，我家既灶頭，可能係全屋最涼爽既地方。

飲飽食醉之後就得o係度，趕都唔肯走


係喎，上次話講子彈既曳野！都好多喎，都唔知點講好。mmm.....就講初一果單先啦。其實一早都知阿子彈仔成日都想郁初一咖喇，又可能初來報到未敢太放肆，最初都表現相敬如賓，子彈仲成日旁住初一好似幾friend咁添，去相...........

意境幾和諧呀，點知.........幻覺尼咖咋


我以為隻彈仔最多都係拍下嚇下初一，點知衰仔都好心狠手辣下，一個唔該，連龜帶缸推落地，可憐既初一嚇到鼻哥窿無肉

現場其實處理過下，缸水流到入房，隻衰仔仲要玩水、滑水、飲水，我兩老，一個善後，一個洗貓


可能係男貓，天性愛霸地盤，子彈進化左放棄原始既屙尿行為，改用武力。今次對象係隻招財貓。


每日可愛既子彈仔都會坐在招財貓旁等我地放工，大門一開，你咪話唔窩心

直至一天，彈氏夫婦放工，天真既彈爸問彈媽：你估子彈仔有無企o係招財貓旁邊等我地丫拿？


有！當然有啦，企到直一直添.........................

唔妥喇，企得咁鬆動既？兩老四隻眼往8點鐘方向掃過去................

落地開花，富貴榮華！我兩老，一個善後，一個洗貓

又話說親子時候既一幕。


自從我用獅子吼功喝過彈仔唔準跳上飯檯攪住我食飯之後，佢真係小左上檯，巧乖仔下囉。我地一邊食飯、彈仔就在檯底舔毛，我間唔中會用腳去擦下佢，佢就會雙手攬住我隻腳，雙腳踩單車.......有時會咁樣玩囉

影完呢幕，我就攞畫面中既膠茶壺入廚房，突然砰一聲，回頭一望，原來彈仔將膠檯布扯左落地，全陪碗碗碟碟爛曬，都算！最慘係隻衰仔全身廚餘，我兩老一個善後、一個洗貓


闖門搶閘快過鬼，呢處更加係彈哥既蓬萊仙島

成日(目及)住我開雪櫃門，一個唔該就跳上去，叫夠都唔肯出尼


仲有一樣，子彈成日玩兜水(比佢飲用果兜)，一係就撥到通地都係，一係就左右手交替推住兜水通屋走，點攪？