醫耳矣~

星期一帶子彈仔睇醫生。

星期日早上，子彈招牌式晨光第一吻時，我一手摸到子彈仔臉頰對上耳窩旁本來軟棉棉的毛變得好硬，睡得渾渾噩噩的我猛然彈起，因為我知除了膿外應該沒有甚麼有這個效果，反起耳窩一看，大鑊。

隨即向彈爸大興問罪：你尋日幫子彈清潔耳仔，無發現佢耳仔唔妥咩！流膿呀！
彈爸擰到頭都甩埋都話無。
無！！！即是12小時唔夠就流膿流到出尼，發炎了，打電話約醫生。


星期一到診所，一五一拾講給醫生知，隨即做了個細菌 test，結果顯示是一般細菌感染，好彩不是甚麼奇難雜症，只需塗耳藥膏便可。

彈媽：醫生，點解會細菌感染？地方污糟嗎？

醫生：其實唔關事，我講你唔好介意喎，我估係你地清潔方法有問題。

彈媽：(怒睥彈爸)，仲唔請教醫生正確方法！

醫生手起刀落示範起來，方法如下：
用棉花搓一粒長長地既球(好似一截手指尾咁上下)，用洗耳藥水(要水狀，不要杰撻撻的)將棉花沾濕，將整粒濕棉花塞入耳窩然後按摩幾下然後將棉花取出便可。(其實一放手貓貓自己fing頭都已連耳內濕棉花 fing 走了)
註：要有耳垢時才需洗耳，平時不用洗

知道洗耳方法後我再問醫生關於子彈仔偶有扯蝦既問題，佢播了一些貓貓哮喘病的短片一邊給我看，一邊要我指出子彈屬於那種喘法，最後覺得子彈可能有哮喘病了(沒肯定喇，未正式驗過醫生無可能確定的)。醫生建議先買空氣清新機看有沒有改善，若再嚴重再作打算。貓友如有好介紹請建議在下為盼。

最後買了一盒洗耳藥膏和一支離胺基酸(我自己要求要的)一家三口烚下烚下離開診所歸家去。

回家後打開袋子彈仔馬上跳出來，彈爸和我都覺得好奇怪為甚麼他沒有即時跑開反而是呆呆地坐在地上，大約半分鐘後只見子彈用前腳行後腳完全不動的行，我地大驚以為子彈後腿癱瘓，後來見佢拖行後腳行了幾步 fing 左粒屎出來就回復正常，哈哈，原來是急屎，嚇死人咩

放低幾兩後的子彈仔又照常的活躍(哎呀！唔記得問 vet 佢係咪有過度活躍症 tim )，玩膠袋都玩得一大餐